Yohanes 20

Para Sisiane Napetang Kuburan Hyang Yesuse Puyung

Ring dina Redite, ritatkala semeng ngremeng lan gumine kari peteng, Ni Maria saking Kota Magdala luas ka kuburan guane. Irika ipun nyingakin batu panekep kuburane sampun makisid. 2 Raris ipun malaib manggihin Simon Petrus lan sisiane sane lianan sane kasayangin olih Sang Hyang Yesus. Ipun mabaos sapuniki, “Layon Guru suba jemaka uling kuburane, lan tiang makejang tusing nawang dijake layon Gurune kagenahang.”

3 Irika raris I Petrus sareng sisiane sane lianan punika luas ka kuburane. 4 Makakalih sisiane punika sareng-sareng malaib, nanging sisiane sane lianan punika gelisan malaib bandingang kapining I Petrus, kantos dumunan rauh ring kuburane. 5 Irika raris sisiane punika mungkutang raga nengok ka kuburane tur nyingakin kasane wenten irika. Nanging ipun nenten ngranjing ka tengah. 6 I Simon Petrus sane nututin saking kuri ngranjing ka tengah kuburane tur nyingakin kasane wenten irika. 7 Nanging ring genah sane lianan, wenten kain panekep prarain Sang Hyang Yesuse magulung. 8 Raris sisiane sane lianan, sane dumunan rauh irika taler ngranjing ka tengah. Irika ipun nyingak tur pracaya yening Sang Hyang Yesus maurip sekadi jati mula. 9 Duk punika ipun makakalih dereng ngerti daging Cakepan Sucine indik Sang Hyang Yesus musti maurip malih sekadi jati mula. 10 Sasampune kenten makakalih sisiane punika mawali budal.

Sang Hyang Yesus Ngedengang Angga kapining Maria saking Magdala

11 Kaceritayang mangkin, Ni Maria ngadeg ring arepan kuburan sambilanga nangis. Duk punika ipun mungkutang raga tur nengok ka tengah kuburane. 12 Irika ipun nyingakin kalih sane mapengangge putih. Malekate punika malinggih ring asagan batu, laad genah layon Sang Hyang Yesuse: asiki ring genah prabun Idane lan sane malih siki ring genah cokor Idane. 13 Makakalih malekat punika raris mataken sapuniki, “Wih anak istri, apa ngranayang ragane ngeling?”

Ni Maria raris masaur sapuniki, “Layon Ratun titiange sampun kaambil, turmaning titiang nenten uning ring dija Ida kagenahang.” 14 Sasampune mabaos sekadi punika, ipun raris mabalik marep kuri tur nyingakin Sang Hyang Yesus ngadeg irika. Nanging ipun nenten eling Anake punika Sang Hyang Yesus.

15 Sang Hyang Yesus mataken sapuniki, “Wih anak istri, apa ngranayang ragane ngeling? Nyen ane alih ragane?”

Ni Maria ngaden Anake punika wantah tukang taman. Punika mawinan Ni Maria mabaos sapuniki, “Jero, napike jero sane ngisidang Ratun tiange? Baosang ja kapining tiang ring dija jerone ngenahang Ida mangda tiang prasida ngambil layon Idane.”

16 Sang Hyang Yesus raris ngandika kapining Ni Maria sapuniki, “Maria!”

Ni Maria raris mabalik nyingakin Sang Hyang Yesus tur mabaos nganggen basa Ibrani sapuniki, “Rabuni!”, sane maarti ‘Guru’.

17 Sang Hyang Yesus raris ngandika kapining Ni Maria sapuniki, “Eda ja cening ngisiang Nira, krana Nira dereng munggah ring Ajin Nirane. Nanging kemu ja sid para semeton Nirane, tur orahin ja ia makejang unduk Nira bakal luas ring Ajin Nirane lan Ajin ceninge, keto masih ring Sasembahan Tunggal Nirane lan Sasembahan Tunggal ceninge.”

18 Irika raris Ni Maria luas mangda manggihin para sisian Sang Hyang Yesuse tur mabaos sapuniki, “Tiang suba ningalin Sang Ratu Agung!” Kenten pada ipun nyeritayang pengandikan Sang Hyang Yesus kapining deweknyane.

Sang Hyang Yesus Ngedengang Angga kapining Para Sisian Idane

19 Ring dina Redite wengi, para sisian Sang Hyang Yesuse sedek mapunduh ring kamar sane korin-korine makunci krana ipun sami jejeh kapining para pemimpin Yahudine. Jeg pramangkin Sang Hyang Yesus rauh tur ngadeg ring tengah-tengah ipune sami saha ngandika sapuniki, “Rahayu ja cening makejang!” 20 Sasampune Sang Hyang Yesus ngandika sekadi punika, Ida ngedengang tangan lan lambung Idane. Risedek ipun sami nyingakin Sang Hyang Yesus, manah ipune kalintang bagia.

21 Raris Sang Hyang Yesus ngandika malih ring para sisiane sapuniki, “Rahayu ja cening makejang. Patuh buka Sang Hyang Aji ngutus Nira, keto masih Nira ngutus cening makejang.” 22 Sasampune kenten, Ida ngupin para sisian Idane saha ngandika sapuniki, “Terima ja . 23 Yening cening anak, dosan anake ento masih kaampurayang olih Sang Hyang Pengardi. Yening cening tusing ngampurayang dosan anak, dosan anake ento masih tusing kaampurayang olih Sang Hyang Pengardi.”

Sang Hyang Yesus Ngedengang Angga kapining I Tomas

24 I Tomas sane kasambat I Kembar, salah tunggal saking makaroras sisian Sang Hyang Yesuse, nenten sareng ritatkala Sang Hyang Yesus rauh. 25 Para sisiane sane lianan mabaos kapining I Tomas sapuniki, “Tiang ajak makejang suba ningalin Sang Ratu Agung!”

Nanging I Tomas masaur sapuniki, “Yening tiang tonden ningalin tanda paku sid tangan Idane, tur nyelek nganggon jerijin tiange sid laad pakune ento, keto masih ngejang liman tiange sid tatun lambung Idane, abedik ja tiang tusing bakal pracaya.”

26 Sasampune aminggu, para sisian Sang Hyang Yesuse malih mapunduh ring tengah umahe punika. I Tomas pada wenten irika. Duk punika, makasami korine kakunci. Nanging Sang Hyang Yesus rauh tur ngadeg ring tengah-tengah ipune sami raris ngandika sapuniki, “Rahayu ja cening makejang.” 27 Sang Hyang Yesus raris ngandika kapining I Tomas sapuniki, “Tingalin ja tangan Nirane, tur celekin ja jerijin liman ceninge dini. Jujuh ja nganggon liman ceninge tur celek ja lambung Nirane. Eda ja buin sengsaya, sakewala pracaya ja!”

28 Irika raris Tomas matur kapining Sang Hyang Yesus sapuniki, “Duh Sang Ratu Agung titiang, Iratu Sang Hyang Tunggal sane sembah titiang!”

29 Hyang Yesus raris ngandika kapining I Tomas sapuniki, “Cening pracaya krana suba ningalin Nira. Bagia ja anake ane pracaya yadiastun tusing ningalin Nira.”

Tatujon Cakepane puniki Katulis

30 Wenten akeh malih paindikan ngangobin sane kakaryanin olih Sang Hyang Yesus ring arepan para sisian Idane, nanging nenten katulis ring cakepane puniki. 31 Lan makasami sane kanikayang iriki sampun katulis mangdane ragane sami pracaya indik Sang Hyang Yesus: Ida puniki nenten tios sane kajanjiang olih Sang Hyang Pengardi, inggih punika Putran Sang Hyang Pengardine. Yening ragane pracaya kapining Ida, ragane ngamolihang urip sujati salamin-laminne.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”